مادام القبر ودود الارض عيّد في جسد ساره - منتدى الشعر

السلام عليكم


عجبتني هاذي المرثيه للشاعر جابر بن هايف العتيبي وحبيت تشاركوني فيها واشوف رايكم



دخيلك قول اي حاجه بلا كل عام وانت بخير = انا من وين اشوف الخير وجرحي تشتعل ناره

بلا خير وبلا عيد وبلا فرحه ولا تكدير = عليك الله ياعيدٍ تعود وميته ساره

على وضعك ياعيد من الحناجر تطلق التكبير = وثوبك ياصباح العيد كل الناس تختاره

وطفلٍ لملم اغراضه ونام بفرحته بكيــــر = وقام من الفجر يلبس ويسأل وين ديناره

وطفله قامت تمشط شعرها من اخوها تغير = تبي تغيظه بشنطتها الجديده وعقد وسواره

وبنتٍ حنت يديها برسمٍ للعيون يثير = وحطت كحل وحطت عطر وزاد العيد بازهاره

ورجلٍ يفتح ابوابه على عزٍ وبلا تقصير = وصوت النجر.. وحمس البن.. وريح الهيل ..في داره

وجمرٍ يحتظن صفر الدلال ويعشق التبخير = وهرجٍ طيب وفلة حجاج وضحك وبشاره

وفرحة ام تبكي من فرحها خانها التعبير = وحارت وتبي تاخذ هدية عيد للجاره

وكل الناس تفرح في صباحك والامور تسير = وترسم في السما شكل الفرح في مبسم الحاره

كذا وضعك ياصبح العيد لكن في عيوني غير = تذكرني بموت وقبر ورمل وطين محضاره

تذكرني بساره ياصباح الجرح والتذكير = تذكرني بدمع الفجر وموت الصبح وانواره

خذتها من سنين يدينك بقسوة بلا تأخير = وماتت في كفوفك ياصباح الموت وحضاره

وهي كانت تجهز ثوب عيد وتعطره تعطير = ولكن الكفن عيّا وشمس العيد غداره

عليك الله ياعيدٍ ذبحت القلب والتفكير = وشلت بداخلي جرحٍ ينوح وانت مزماره

ثلاث سنين وصبح العيد ثوبي مشققٍ وقصير = وكفي تملا جيوبي برمل القبر واحجاره

ثلاث سنين اجي للقبر مره صبح ومره عصير = واضمه وامسحه وابكي عليه وانشق غباره

ثلاث سنين وباقي العمر لا طيب ولاني بخير = مادام القبر ودود الارض عيّد في جسد ساره


احترامي